Prestigjozja gjermane “Deutsche Welle” ka raportuar për gjykimin e bërë ndaj tre policëve kosovarë në Serbi, duke thënë se kjo e fundit ka vazhduar me procedurat e gjykimit pa marr parasysh kërkesat e ndërkombëtarëve për lirim të menjëhershëm dhe pa kushte.
Pas arrestimit të tre oficerëve kosovarë në Serbi, SHBA ka kërkuar vazhdimisht lirimin e tyre. Por prokurorët publikë po ecin përpara me akuza, duke rritur më tej tensionet, shkruan artikulli. Një gjykatë serbe të premten urdhëroi vazhdimin e paraburgimit dhe hetimit ndaj tre policëve të Kosovës që u arrestuan në Serbi në fillim të javës.
Hapja e procedurave ligjore erdhi pasi i dërguari i posaçëm i SHBA-së për Europën Juglindore, Gabriel Escobar, kërkoi lirimin e oficerëve, në përputhje me kërkesën e Departamentit të Shtetit.
“Ata ose ishin marrë ose përfunduan në Serbi pa e pasur qëllim. Duhet të lirohen pa kushte” tha Escobar në një konferencë për shtyp në internet.
Zyra e Prokurorit Publik në qytetin serb të Kralevës tha se i kishte akuzuar tre policët për prodhim, posedim, mbajtje dhe trafikim të paautorizuar të armëve dhe substancave shpërthyese.
“Gjyqtari për procedurën paraprake të Gjykatës së Lartë në Kralevë urdhëroi paraburgimin e të gjithë të dyshuarve”, tha zyra e prokurorit në një deklaratë. Rrethanat e arrestimit janë kundërshtuar nga Serbia, e cila deklaron se oficerët ishin thellë brenda territorit serb.
Kryeministri i Kosovës Albin Kurti e përshëndeti thirrjen për lirimin e policëve. Ai deklaroi se: “Serbia i rrëmbeu ata, në një rrugë në Kosovë të përdorur nga kontrabandistët serbë”.
Arrestimi i policëve kosovarë është episodi më i fundit në përshkallëzimin e vazhdueshëm të tensioneve mes dy fqinjëve. Pjesëtarët e pakicës serbe në veri të Kosovës kanë protestuar kundër zgjedhjes së kryetarëve shqiptarë të komunave në qytetet e tyre pasi shumica e serbëve etnikë bojkotuan votimin.
Protestat shpërthyen në dhunë, me serbët e Kosovës që u përplasen me policinë dhe paqeruajtësit e udhëhequr nga NATO, disa prej të cilëve u plagosën në përleshje.
Serbia më pas urdhëroi që trupat e saj të ishin në gatishmëri më të lartë. BE-ja, Britania e Madhe dhe SHBA-ja u kanë bërë thirrje të dyja palëve të çtensionojnë situatën. Serbia nuk e njeh pavarësinë e Kosovës, të shpallur në vitin 2008 pas një lufte në fund të viteve 1990 që la mbi 10,000 njerëz të vdekur, shumica e të cilëve ishin nga komuniteti etnik shqiptar, përfundon artikulli i DW.
