Sekretarja e përgjithshme e Ministrisë së Shëndetësisë, Joana Duro do të dalë ditën e sotme para Gjykatës së Posaçme. Duro dhe specialistja e Nivelit të Lartë në Agjencinë e Ofrimit të Shërbimeve Publike të Integruara, Luara Shteto do të njihen sot me masën e sigurisë, ndërsa seanca pritet të zhvillohet në orën 13:00.
Duro u arrestua bashkë me Sheton më 2 qershor 2023, pasi dyshohet se ajo mori ryfshfet 330 mijë lekë për të favorizuar kompaninë 'DRICONS’ në një tender të hapur nga ministria për supervizimin për rikonstruksionin e qendrave shëndetësore në Tiranë dhe Durrës. Në agjencinë e prokurimit publik shihet se përkundër vlerës prej 805.872.23 lekë të vendosur si fond limit nga ministria për tenderin, kompania fituese ka ofruar 672.457.60 lekë.
Dy zyrtaret akuzohen për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Korrupsioni aktiv i funksionarëve të lartë shtetërorë ose të zgjedhurve vendorë”. Hetimet e SPAK për korrupsionin me tenderin e Ministrisë së Shëndetësisë kanë çuar në ndalimin e administratorit të kompanisë, 'DRICONS’, Vladimir Topi dhe inxhinierin Silvi Shehi.
