“Kosova është zemra e Serbisë – ndaleni dhunën”. Tenisti serb Novak Djokoviç e ka të qartë se mund të ndëshkohet për mesazhin politik në lidhje me Kosovën gjatë turneut Roland Garos, por ka këmbëngulur se do të vazhdojë të përkrahë serbët e Kosovës.
Pas fitores kundër Aleksandar Kovacevic (6-3, 6-2, 7-6), ai shkroi para kamerës parullën: “Kosova është zemra e Serbisë – ndaleni dhunën”, duke thënë mesazh të qartë politik.
Djokoviç, i cili pasi Kosova e shpalli pavarësinë më 2008 doli me një mesazh kundërshtues duke e quajtur Kosovën Serbi, vazhdon të mbajë qëndrim të njëjtë edhe 15 vite pas.
“Unë nuk jam politikan dhe nuk e kam për qëllim të përfshihem në debate politike. Kjo çështje është shumë e ndjeshme dhe si serb më lëndon shumë gjithçka që po ndodh në Kosovë”, tha Djokoviç.
Ai po i referohej tensioneve në veri të Kosovës, të cilat u rritën qysh më 26 maj, kur Policia e Kosovës hyri me forcë në komunat me shumicë serbe: Zveçan, Zubin Potok dhe Leposaviq, për t’ua mundësuar kryetarëve të rinj shqiptarë ta nisin punën pasi dolën fitues në zgjedhjet e jashtëzakonshme të prillit.
Djokoviç, babai i të cilit ka lindur në Zveçan, tha: “Nuk e di çfarë do të ndodhë, dëgjova që ka pasur shumë kundërshtime (për mesazhin tim) në rrjetet sociale dhe nëse unë do të ndëshkohem, por unë nuk zmbrapsem, do ta bëja përsëri”, këmbënguli 36-vjeçari.
Ai shtoi: “E pakta çka mund të bëj është të ofroj përkrahje si figurë publike, veçanërisht si i biri i një njeriu që la lindur në Kosovë...Kosova është vatra jonë, manastiret tona më të rëndësishme janë atje”, pretendoi Djokoviç.
