Kryetari i Partisë Demokratike Sali Berisha u ka bërë sërish thirrje qytetarëve që të dalin në votime. Në një deklaratë për mediat nga selia blu, Berisha garantoi qytetarët se opozita po mbikëqyr me sukses të plotë procesin e votimit.
“Falënderoj të gjithë qytetarët që nga ora 7 e mëngjesit kanë votuar, kanë kryer një detyrë kushtetuese jashtëzakonisht të rëndësishme. U bëj thirrje të gjithë qytetarëve që ende nuk kanë votuar, të votojnë, të paraqiten në orët në vazhdim në qendrat e votimit dhe të votojnë si një shërbim i jashtëzakonshëm që i bëjnë vendit dhe familjes së tyre.
Garantoj qytetarët se opozita po mbikëqyr me sukses të plotë këtë proces. Ajo sot është më e fuqishme se kurrë. Vota e tyre ka mbrojtjen absolute të opozitës shqiptare. Çdo lloj përpjekje që po bën narko shteti është e destinuar të dështojë. Qytetarëve u them se policia ka marrë pushim sot, por pavarësisht nga kjo, ju votoni si njerëz të lirë. Opozita po mbikëqyr çdo votë tuajën”, tha Berisha.
