Vendimi i lënies në burg të kandidatit të koalicionit “Bashkë Fitojmë”, Fredi Beleri ka sjellë reagime të ashpra nga Athina zyrtare. Sipas palës greke, vendimi është një akt i pa precendentë që do të dëmtojë marrëdheniet dypalëshe.
“Vendimi i sotëm i gjykatës së Vlorës është skandaloz. Arrestimi i kandidatit për bashkinë e Himarës dy ditë përpara zgjedhjeve, nuk tregon shtet të së drejtës. Vendimi për burgosjen e kandidatit për kryetar bashkie, sjell përmbysjen e rregullave të barazisë në zgjedhjet lokale në Himarë, e cila është një qendër e rëndësishme e minoritetit etnik grek në Shqipëri...Vendime si i sotmi shkelin rregullat e mësipërme. Ato tregojnë në realitet Shqipëria nuk po ndjek rrugën europiane”– përfundon deklarata e Ministrisë së Jashtme greke.
Kandidati i koalicionit Meta-Berisha për bashkinë e Himarës, Fredi Beleri është lënë në burg nga gjykata e Vlorës. Ky vendim erdhi një ditë pasi ai u arrestua për ‘korrupsion aktiv në zgjedhje’. Beleri është transportuar për në qelitë e paraburgimit në Tiranë. E pranishme në sallë për të ndjekur nga afër punimet e seancës së sotme ka qenë edhe ambasadorja greke në Tiranë, Konstantina Kamitsi.
