Policia ka mohuar pretendimet e kandidatit të opozitës për bashkinë e Dibrës, Ismail Uka se 3 zyrtarë të kësaj bashkie po shpërndanin para në këmbim të votave për kandidatin socialist.
Policia thotë se rreth orës 16:50 të së premtes në sallën operative të Drejtorisë Vendore të Policisë Dibër është bërë një telefonatë nga Ismail Uka i cili ka kërkuar ndihmën e policisë pasi pretendonte se në “Lagjen e Re” të qytetit të Peshkopisë kishte konstatuar 3 shtetas që dyshonte se po shpërndanin vlera monetare për blerje votash.
“Shërbimet e policisë kanë shkuar menjëherë në adresën e dhënë si dhe është njoftuar prokurori i gatshëm në lidhje me pretendimet e shtetasit Ismail Uka. Po në lidhje me pretendimet e tij, u ngrit menjëherë grupi hetimor i cili nën drejtimin e Prokurorit, kreu një sërë veprimesh procedurale, si këqyrja e kamerave të një subjekti ku pretendonte kandidati dhe verifikimi nga Prokurori, i banesës së shtetasit Elton Lleshi.
Gjatë kontrollit të kryer nuk u konstatua asnjë send i kundraligjshëm apo që lidhet me pretendimet e shtetasit Ismail Uka. Shërbimet e Policisë kanë shoqëruar shtetasin Elton Lleshi, 33 vjeç dhe dy shtetaset që ishin me të, konkretisht S.Z., 37 vjeçe; E.D., 22 vjeçe, dhe pas marrjes në pyetje nga Prokurori, në përfundim të shpjegimeve të dhëna janë lënë të lirë” – thuhet në reagimin e policisë. ©LAPSI.al
