Një 39-vjeçar turk është arrestuar në Gjirokastër për trafikim të klandestinëve. Blutë njoftojnë se shtetasi E. P u kap në flagrancë duke transportuar 5 emigrantë që do të kalonin kufirin në mënyrë të paligjshme. Automjeti që ai drejtonte ishte nisur për në Shkodër.
"Ky shtetas është kapur në flagrancë nga shërbimet e Policisë, në Memaliaj, duke transportuar kundrejt pagesës, me automjetin tip "Peugeot", në drejtim të Shkodrës, 5 emigrantë nga Bangladeshi, të cilët do të kalonin kufirin në mënyrë të paligjshme". , thuhet në njoftim.
Në cilësinë e provës materiale u sekuestruan automjeti "Peugeot", 1 aparat celular dhe një shumë parash.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprën penale "Ndihma për kalim të paligjshëm të kufirit".
