Kryeministri Rama ka folur mbrëmjen e sotme për inceneratorët, ku i ka cilësuar vepra të një rëndësie të veçantë. I ftuar mbrëmjen e sotme në “Now me Erla Mëhillin”, Rama u shpreh se inceneratorët kanë ndryshuar tërësisht të sotmen dhe kanë siguruar plotësisht të ardhmen e pastrimit të zonave ku janë vendosur.
“Kanë qenë zona të detyruara të bashkëjetojnë me vatra kanceri dhe sot i administrojnë dhe i përpunojnë mbetjet me standardet më të larta. Që nuk incenerojnë është histori shumë banale e thënë dhe e stërthënë. Ato janë tre vepra shumë të rëndësishme dhe unë jam shumë krenar që i kemi bërë. Ato vepra kanë shpëtuar popullata të tëra nga helmi dhe pasojat e helmeve në mushkëri dhe shëndetin e tyre dhe të fëmijëve”, u shpreh Rama.
Më tej kryeministri u pyet nëse është krenar dhe për zyrtarët që janë pas hekurave për çështjen e inceneratorëve, duke përmendur këtu Lefter Kokën e Alqi Bllakon. Rama tha se kjo është çështje e drejtësisë dhe jo çështje e tij.
“Kush nga ata që kanë marrë pjesë në ndërtimin e këtyre veprave ka përfituar pas kurrizit tonë dhe në shkelje të ligjit përmes kësaj pjesëmarrje të shkojë aty ku s’thuhet. Kjo është çështje e drejtësisë, nuk është çështje e imja”, u përgjigj kryeministri.
