Të shtunën, forcat ajrore ukrainase njoftuan se kanë rrëzuar një raketë hipersonike ruse mbi Kiev. Ata kanë përdorur sistemet amerikane Patriot të mbrojtjes ajrore. Kjo arritje shënon rastin e parë të Kievit ku është diktuar një nga raketat më moderne të Moskës.
Komandanti i Forcave Ajrore, Mykola Oleshchuk, tha në një postim në rrjetin Telegram se raketa balistike e tipit Kinzhal ishte diktuar në një sulm gjatë natës së 4 majit, në kryeqytetin ukrainas. Kjo është gjithashtu hera e parë që bëhet e ditur se Ukraina ka përdorur sistemet Patriot të mbrojtjes.
“Po, ne e rrëzuam raketën unikale Kinzhal”, shkruante zoti Oleshchuk. “Kjo ndodhi gjatë sulmit të natës më 4 maj në qiellin e rajonit të Kievit.”
Ai tha se raketa Kh-47 u lëshua nga një avion MiG-31K nga territori rus. Ajo u rrëzua me një raketë Patriot. Kinzhal është një nga armët më të fundit dhe më të përparuara ruse.
Ushtarakët rusë pohojnë se raketa balistike e lëshuar nga ajri ka një rreze veprimi deri në 2,000 kilometra dhe fluturon me një shpejtësi 10 herë më të madhe se shpejtësia e zërit, duke e bërë të vështirë zbulimin e saj.
Ndërthurja e shpejtësisë hipersonike me pjesën e përparme të rëndë të raketës, bën të mundur që Kinzhal të shkatërrojë objektiva shumë të fortifikuara, si bunkerë nëntokësorë apo tunele malore.
Ushtria ukrainase është shprehur më parë se i mungonin armët e duhura për të zbuluar raketën balistike Kinzhal me shpejtësi shumë të madhe.
Ukraina mori dërgesën e parë të sistemit të raketave Patriot në fund të prillit. Nuk ka të dhëna për numrin apo ku janë vendosur. Megjithatë dihet se ato janë siguruar nga Shtetet e Bashkuara, Gjermania dhe Holanda./VOA
