13 kilogramët e heroinës që u kapën të dielën në Durrës, mbeten ende pa një pronar. Shoferi i autobusit dhe drejtuesi i kompanisë së transporteve në mjetin e të cilit u gjet lënda narkotike, kanë mohuar përfshirjen e tyre në këtë aktivitet. Në telefonat e bllokuar, policia po përpiqet të gjejë kontaktet e fundit. Po dhe bisedat e mëparshme që mund të jenë bërë me palën pritëse në Itali.
Shoferi dhe pronari i linjës së autobusëve në mjetin e të cilëve u gjetën 13 kilogramë heroinë në Portin e Durrësit kanë mohuar të kenë lidhje me lendën narkotike.
Në deklaratën e tij të parë përpara grupit hetimor drejtuesi i mjetit , 57-vjeçari Piro Rrushi mohoi se ai kishte dijeni se lënda narkotike ndodhej në autobusin që ai po dejtonte në linjës Durrës-Milano.
Nga ana tjetër pronari i linjës së autobusëve Mikel Pici 32-vjeç, pasi mohoi gjithçka në fillim, më vonë zgjodhi që në këtë pikë të hetimeve të mbrohej në heshtje!
13 kilogramë e 750 gramë heroinë zbuluan punonjësit e Policisë Kufitare të Portit të Durrësit pasi prenë me troko pjesën metalike të krijuar enkas për fshehjen e drogës të dielën.
Heroina e ndarë në 26 pako të mbështjella me natriban u gjet në pjesën e pasme të autobusit.
Nga kontrolli i imtësishëm duke përdorur edhe teknikat bashkëkohore të kontrollit, shërbimet e policisë gjetën në pjesën e pasme të autobusit heroinën e paketuar me peshë totale 13 kilogramë e 750 gramë e cila u sekuestrua në cilësinë e provës materiale.
Në flagrancë është arrestuar pronari i firmës së linjës së autobusëve Durrës-Milano, Mikel Pici, 32-vjeç, të cilit gjatë kontrollit fizik iu gjet edhe një dozë lëndë narkotike kokainë, si dhe edhe shoferi i autobusit Piro Rrushi.
Porti i Durrësit është një ndër pikat kryesore hyrëse dhe dalëse të vendit tonë, ndërsa në vitet e fundit atje janë kapur qindra kilogram drogëra të forta, kryesisht të ardhura nga vendet e amerikës latine.
