Gjyqi në Spanjë kundër këngëtares Shakira, për një mashtrim tatimor të dyshuar prej 14.5 milionë euro, është planifikuar të fillojë në nëntor.
Burimet ligjore raportuan të enjten se një gjykatë në qytetin e Barcelonës, ku Shakira jetonte me partnerin e saj të atëhershëm Gerard Pique, ka caktuar datën 20 nëntor si datën e gjyqit, të planifikuar për 12 seanca përgjatë nëntorit dhe dhjetorit me rreth 200 dëshmitarë. Megjithatë, gjykimi mund të shkurtohet nëse artistja, për të cilën prokuroria kërkon tetë vjet e dy muaj burg dhe 23.8 milionë euro gjobë, arrin marrëveshje në minutën e fundit me prokurorinë.
Arsyeja pse janë caktuar 12 seanca është numri i madh i dëshmitarëve të propozuar nga palët, me 100 dëshmitarë të propozuar nga Prokuroria e Shtetit, rreth 30 nga Prokuroria dhe 60 nga mbrojtja. Gjyqtari ka pyetur palët nëse do të mund të zvogëlohej numri i dëshmitarëve, të cilin prokuroria dhe mbrojtja janë të gatshme ta marrin në konsideratë për të përshpejtuar gjykimin.
Në të njëjtën kohë, ai ka propozuar që Shakira, e cila jeton në Miami (Shtetet e Bashkuara të Amerikës), pas ndarjes nga ish-futbollisti, të marrë pjesë vetëm në seancën në të cilën është planifikuar të dëshmojë dhe në ditën e fundit, në të cilën i akuzuari ka të drejtën për të bërë një deklaratë përfundimtare. Mbrojtja e saj pretendon se ajo nuk ka qenë në rezidencën e saj në Spanjë deri në vitin 2014 dhe thekson se që nga viti 2011 këngëtarja ka paguar më shumë se 104 milionë euro taksa në vende të ndryshme./Lapsi.al
Marrë nga: Marca
