Këtë të dielë u mbajtën zgjedhjet në veri të Kosovës, në katër komunat me shumicë serbe, Mitrovicë e Veriut, Zubin Potok, Zveçan dhe Leposaviç. Pjesëmarrja në zgjedhje ishte e ulët pasi Lista Serbe ka bojkotuar procesin. Në përfundit të numërimit ka rezultuar se Lëvizja Vetëvendosje ka fituar në 2 komuna. Ndërkohë PDK-ja triumfoi në dy të tjerat. Përkatësisht, Lëvizja Vetëvendosje ka fituar në Mitrovicën e Veriut dhe në Leposaviç ndërsa në Zubin Potokun dhe Zveçanin qytetarët i kanë ‘besuar’ PDK-së.
Komisioni Qendror i Zgjedhjeve bëri të ditur se procesi zgjedhor në katër komunat në veri të Kosovës u mbyll me 1.567 votues, pra me vetëm 3.47% të trupit votues. Komunat në veri mbetën pa kryetarë nga nëntori i vitit të kaluar. Asokohe përfaqësuesit serbë në atë zonë dhanë dorëheqje nga vendet e tyre të punës. Ky akt u krye për shkak të mospajtimit me një vendim të qeverisë së Kosovës për riregjistrimin e makinave që kishin targa ilegale serbe.
