Diplomatët e lartë amerikanë kanë vendosur të godasin fort përpjekjet e presidentit serb Vuçiç për të bojkotuar zgjedhjet në katër komuna të veriut të Kosovës, duke e detyruar Listën serbe të mos marrë pjesë në to. I dërguari special amerikan, Gabriel Escobar bëri dy deklarata të fuqishmë në favor të shtetit kosovar, duke bërë më dije se vendi i tij do t'a njohë rezultatin e zgjedhjeve, pavarësisht bojkotit të Listës Serbe. “Do të ketë zgjedhje dhe ne do t’i njohim rezultatet dhe shpresojmë që serbët të kthehen në një moment në institucione”, tha Escobar. Duke komentuar tentativat për të frikësuar një kandidat tjetër Alleksandar Jabllanoviç, nga Partia e Serbëve të Kosovës që garonte për kryetar të Leposaviçit, Escobar shtoi në një koment për agjensinë Tanjug: “Djegia e automjeteve, pasurisë së paluajtshme dhe kërcënimet ndaj njerëzve që duan të integrohen nuk vijnë nga shqiptarët etnikë, por nga serbët, kështu që mendoj se kërcënimet ndaj komunitetit serb në Kosovë duhet të ndalen nga të gjitha anët”, deklaroi i dërguari special i ShBA-së, Gabriel Escobar për “Tanjug”.
Lexo me tej:
Escobar: Do njohim zgjedhjet në veri të Kosovës edhe pa Listën Serbe
Më 23 prill, pritet të mbahen zgjedhjet e jashtëzakonshme për kryetarë të komunave të Mitrovicës së Veriut, Zveçanit, Zubin Potokut dhe Leposaviqit, si dhe zgjedhjet e parakohshme për dy kuvendet komunale, në Zveçan dhe Leposaviq.
Në garë për kryetar të këtyre komunave janë 10 kandidatë nga tri subjekte politike, prej të cilëve vetëm një nga komunitetit serb.
Lista Serbe, partia kryesore e serbëve në Kosovë, nuk ka aplikuar për të marrë pjesë në këto zgjedhje, me arsyetimin se nuk i janë përmbushur dy kërkesa: formimi i Asociacionit të komunave me shumicë serbe, dhe tërheqja e njësiteve speciale të Policisë së Kosovës nga veriu.
Tensioni në Veri/ Serbët bojkotojnë dhe kërkojnë “Zajednicën”
Zgjedhjet e jashtëzakonshme po organizohen pasi kryetarët e këtyre komunave – nga radhët e Listës Serbe, partisë më të madhe të serbëve në Kosovë – kanë dhënë dorëheqje në nëntor të vitit të kaluar, si shenjë kundërshtimi ndaj vendimit të Qeverisë së Kosovës për riregjistrim të makinave me targa ilegale serbe në RKS – Republika e Kosovës. Menjëherë pas kësaj ngjarjeje presidentja Vjosa Osmani shpalli zgjedhje të reja të parakohshme, por falë presionit amerikan autoritetet e Kosovës u detyruan t'i shtynë ato.
Tani kur duket sikur Beogradi po përpiqet ta marrë zvarrë procesin duke dashur t'i shtyjë sërish zgjedhjet diplomacia e Uashingtonit ka dalë hapur në mbrojtje të sovranitetit të Kosovës. Ky episod duket pak i çuditshëm sepse prej një kohe të gjatë Amerika dukej sikur qe rreshtuar në krah të Vuçiçit, në përpjekje për ta përkëdhelur atë për të distancuar nga Rusia. Në kuadër të kësaj strategjie Uashingtoni ka qenë më pranë Beogradit gjëtë dialogut me Kosovën dhe sidomos në mbështetje të plotë të tij për themelimin e asocacionit.
Kris Hill, trajektorja e bombarduesit të Millosheviçit, sot mik i Vuçiçit
Por së paku për episodin e zgjedhjeve diplomatët amerikanë kanë qenë të qartë dhe kjo u konfirmua edhe në një prononcim të ambasadorit në Kosovë për Radion Evropa e Lirë. Jeffrey Hovenier, ka thënë sot se qëndrimi amerikan është i qartë dhe nuk ka ndryshuar lidhur me procesin zgjedhor në veri të Kosovës. Ai u bëri thirrje të gjitha partitë politike që të marrin pjesë “në këtë proces demokratik”, duke tërhequr vërejtjen se “të gjitha përpjekjet për të penguar mbajtjen e zgjedhjeve përmes kërcënimeve apo përdorimit të dhunës, do të përballen me dënimin e fuqishëm të komunitetit ndërkombëtar”.
“Shtetet e Bashkuara dhe partnerët tanë do ta vëzhgojnë këtë proces nga afër”, ka thënë zoti Hovenier, duke kërkuar njëkohësisht nga Qeveria e Kosovës të dëshmojë ndjeshmëri ndaj shqetësimeve të qytetarëve që jetojnë në veri të Kosovës.
©Lapsi.al
