Negociatat për më shumë se tre ditë mbi rritjen e pagave të punonjësve në sektorin publik në Gjermani kanë përfunduar pa sukses. Kreu i sindikatës ‘Verdi’, Frank Werneke, tha se “në fund, duhej të arrinim në përfundim se dallimet nuk mund të tejkaloheshin”.
Në të njëjtën mënyrë u prononcua edhe Ulrich Silberbach, kreu i shoqatës gjermane të nëpunësve civil ‘DBB’. Menjëherë më pas, ministrja federale e Brendshme dhe Komunitetit, Nancy Faeser, tha se synimi dhe dëshira e tyre ishte të arrinin një marrëveshje të mirë kolektive për mbi 2,5 milionë punonjës të qeverisë federale dhe lokale.
“Ne bëmë një rrugë të gjatë drejt akomodimit të sindikatave. Por sindikatat nuk ishin gati për marrëveshje”, tha ministrja Faeser, duke shtuar se tani do të ketë ndërmjetësim.
Gjatë periudhës së ndërmjetësimit nuk u lejuan greva.
Ministrja Faeser dhe kryenegociatorja për komunat, Karin Welge, shprehën keqardhje që sindikatat kishin deklaruar dështim të negociatave. Punëdhënësit kishin ofruar 8 për qind më shumë të ardhura dhe një minimum prej 300 euro.
Sindikatat ‘Verdi’ dhe ‘DBB’ kërkojnë 10,5 për qind më shumë të ardhura dhe të paktën 500 euro më shumë në muaj. Kjo shumë minimale ka një rëndësi të veçantë për sindikatat, pasi synohet të kompensojë punonjësit me të ardhura më të ulëta ndaj inflacionit të lartë.
