Një 23-vjeçar i identifikuar si Klesti Qordja është vënë nën hetim nga Prokuroria e Tiranës. Ai akuzohet se ka goditur me grusht drejtorin e Europol Tirana, Artan Bajraktari. Mësohet se ngjarja është regjistruar në fillim të muajit shkurt.
Prokuroria e Tiranës sqaron se Bajraktari po lëvizte me makinë në zonën e Laprakës, kur 23-vjeçari është acaruar se ishte parakaluar nga zyrtari i policisë. I riu i ka bërë me shenjë atij që të ndalojë.
Pas këtij momenti ata kanë zbritur nga mjetet dhe Klesti Qordja e ka goditur atë me grusht edhe pse ishte paralajmëruar nga Bajraktari se ai ishte pjesë e Policisë së Shtetit. I riu është ndaluar më vonë nga policia dhe ka pranuar autorësinë e ngjarjes.
Ai ka thënë se donte ta pyeste se cila ishte arsyeja që e kishte parakaluar. Ndërsa për dhunën e ushtruar, pretendon se ishte për vetëmbrojtje pasi shefi i Europol i kishte vënë dorën në qafë. Prokurorja Mirela Zavalani ka ngritur ndaj të riut akuzën e plagosjes së lehtë me dashje.
LEXO EDHE: Rifillon punën ish-shefi i Interpolit Artan Bajraktari. Po tani kush e ka fajin?
