Një prokuror në Katar ngriti padi penale kundër ish-ministrit të financave të vendit Ali Sherif al-Emadi, njoftoi sot agjencia shtetërore e lajmeve.
Emadi dhe një numër i paspecifikuar i të tjerëve akuzohen për ryshfet, shpërdorim të pozitës dhe pushtetit, dëmtim të fondeve publike dhe pastrim parash, njoftoi Agjencia e Lajmeve të Katarit (QNA).
Kujtohet se Ali Sharif al-Emadi u arrestua në maj të vitit 2021 me akuzën e shpërdorimit të detyrës dhe përvetësimit të parave publike dhe u lirua nga detyra.
Pas zbulimit të skandalit, emiri i Katarit, Sheikh Tamim Bin Hamad Al Thani, shkarkoi Ali Sharif Al Emadi nga detyrat e tij si Ministër i Financave, ku më pas caktoi Ali Bin Ahmed Al Kwari, i cili shërbeu më parë si Ministër i Tregtisë dhe Industrisë.
Prokurori i Përgjithshëm kishte urdhëruar arrestimin e ministrit të Financave Ali Sharif al-Emadi për t’u marrë në pyetje me akuzat për krime në sektorin publik, përvetësim dhe shpërdorim detyre.
Al-Emadi u emërua në Ministrinë e Financave në vitin 2013, ndërsa shërbente si kryetar i bordit të linjës ajrore shtetërore Qatar Airways dhe kryetar i bordit të Bankës Kombëtare të Katarit (QNB) , huadhënësi më i madh në Lindjen e Mesme dhe Afrikë. Ai u ul gjithashtu në bordin e fondit të fuqishëm të pasurisë sovrane prej 300 miliardë dollarësh, Katar Investment Authority (QIA).
