Përfaqësuesi Special i Bashkimit Evropian për Ballkanin Perëndimor, Miroslav Lajçak nis sot vizitën e tij në Beograd, në kuadër të përgatitjeve për takimin e ardhshëm të liderit serb dhe atij të Kosovës, Albin Kurti në Ohër.
Në orën 14:30, Lajçak do të takohet me presidentin e Serbisë, Aleksandar Vuçiç, pas qëndrimit dyditor në Prishtinë, ku ka biseduar me kryeministrin e Kosovës, Albin Kurti dhe aktorë të tjerë politikë.
Fokusi i bisedimeve do të jetë udhërrëfyesi për zbatimin e marrëveshjes për rrugën drejt normalizimit të marrëdhënieve ndërmjet Kosovës dhe Serbisë, për të cilën Vuçiç dhe Kurti, sipas kreut të diplomacisë evropiane, Josep Borej, ranë dakord më 27 shkurt në Bruksel.
Më 9 mars në Prishtinë, Lajçak tha se ka pasur një bisedë konstruktive dhe shumë të rëndësishme me Kurtin për zbatimin e Marrëveshjes dhe ka shtuar se takimi i ka përmbushur pritjet e tij dhe se ai “e kupton mirë” se cilat janë pritshmëritë e Kosovës.
Pas takimit me Kurtin, diplomati sllovak u shpreh gjithashtu se të dyja palët duhet të pajtohen për aneksin e zbatimit, sepse marrëveshja për rrugën drejt normalizimit të marrëdhënieve ndërmjet Kosovës dhe Serbisë nuk do të jetë juridikisht e detyrueshme pa të.
