Kreu i Partisë së Lirisë, Ilir Meta ka dalë në një deklaratë për mediat ku foli për situatën politike në vend. Ai u pyet nëse gjatë takimit me ambasadoren e Shteteve të Bashkuara të Amerikës ai pati ndonjë presion për sa i takon zgjedhjeve të 14 majit apo koalicionit me kryetarin e Partisë Demokratike Sali Berisha.
Pyetja: Takimi me Yuri Kim, a ka pasur presion për të mos patur një koalicion me zotin Berisha, në të kundërt do sanksionoheni dhe ju?
Meta: Kjo është zero e vërtetë. Marrëdhëniet e mia me SHBA janë shumë të hapur dhe parimore. Gjithmonë kam marrë vendimet e mia bazuar në Kushtetutën tonë. Kështu që nuk ka asnjë lloj presioni. Përkundrazi kemi pasur një bisedë konstruktive. SHBA janë të interesuara për një opozitë shumë të fuqishme, që në vend të funksionojë llogaridhënia. Gjithçka tjetër janë thashetheme të portaleve të kryeministrit. E kam falenderuar Yuri Kim për bashkëpunimin e shkëlqyer me institutin republikan.
