Enkelejd Alibeaj iu kërkoi demokratëve të bashkohen për zgjedhjet e 14 Majit. Në një prononcim për mediat pas mbledhjes së kryesisë që erdhi vetëm pak ditë pasi Apeli ktheu për rigjykim në shkallën e parë çështjen për PD, Alibeaj prezantoi planin me tre pika që sipas tij ka në fokus zgjedhjet e 14 majit.
“Ajo që kam propozuar është që fokusi kryesor janë zgjedhjet. PD e ka detyrim të fortë që të jetë e fokusuar te zgjedhjet. Për këtë arsye, tre janë çështjet që propozova për të cilat gjeta mbështetjen.
Së pari, lidhur me aleancat. PD merr përsipër ndërtimin e një aleance sa më të gjerë të të gjitha partive të qendrës së djathtë me qëllim maksimizimin e votave, ku secili subjekt zhvillon identitetin e vet politik.
Së dyti, lidhur me këshillat bashkiak, Në bazë edhe të vendimit të kryesisë edhe të kolegjit të kryetarëve, duhet të fillojë nga puna duke ftuar demokratët e intelektualët që kanë qëndruar në momente të vështira të PD që të bëhen pjesë e listave të këshilltarëve të PD në bashkitë respektive. Do të jetë vendimmarrje e kryesisë së partisë lidhur me përbërjen e listave dhe modalitetet e tjera.
Së treti, për kandidatët për kryetarë bashkie. Në funksion të bashkimit, votimet me primare nga grupi i rithemelimit dhe kandidatë të tjerë i kanë propozuar PD dhe kemi gjetur mbështetjen për hapjen pa asnjë kufizim ndaj gjithë prurjeve, kandidatëve tanë dikur të propozuar, kandidatëve nga Rithemelimi e kandidaturave të tjera me një synim të vetëm me daljen me një kandidat të vetëm në çdo bashki”, tha Alibeaj.
