Autori i masakrës që la pas 3 viktima dhe 3 të lënduara, Dan Hutra, do të dalë sot përballë drejtësisë. Seanca e tij do të zhvillohet në Gjykatën e Tiranës. Më herët, përballë hetuesve, Hutra është treguar gjakftohtë. Për më shumë ai as nuk ka shfaqur pendesë për krimet makabre të kryera.
'Emri' i Dan Hutrës tronditi mbarë opinionin publik. I armatosur me kallashnikov ai mori jetën e 3 grave të pafajshme dhe plagosi 3 të tjera. Dan Hutra, një ish-i dënuar për vrasje, u arrestua pas rreth 7 orësh në arrati pranë landfillit të Sharrës. Aty ai mendohet se do të kryente vrasjen e radhës.
Ç'ndodhi të mërkurën?
Dan Hutra 'shokoi' kryeqytetin me 3 ngjarje të ndryshme kriminale. Makabriteti i veprimeve të tij la pas 3 gra të vrara dhe 3 të tjera të plagosura. Gjakftohtë dhe i armatosur ai u përlesh fillimisht me Marjana Gurakuqin ne Astir duke tentuar t’i marrë paratë. Gurakuqin e la të plagosur me thikë. Më pas ai shkoi në banesën e familjes së ish-bashkëshortes së tij Elena Hysës në zonën e Kodër-Kamzës. Aty qëlloi me breshëri drejt grave të familjes. Si rrjedhojë la pa jetë motrën e gruas dhe nusen e vëllait të saj dhe plagosi ish-bashkëshorten dhe nënën e saj.
Gjakftohtë pasi kreu krimin ai u largua i armatosur me mjetin e tij Benz. Hutra iku nga vendngjarja jo për t’u arratisur, por për të kryer një tjetër krim. Kësaj radhe ‘goditi’ në rrugën “Besëlidhja” në Kamëz. Aty ai vrau shtetasen Etleva Kurti, 31 vjeçe. E tërë kjo pa u ndeshur me asnjë pikë kontrolli apo patrullë policie.
Megjithatë, nuk ishte hera e parë që Dan Hutra përfshihej në krime. Në vitin 2003 ai është arrestuar për pengmarrje të nënës dhe kunatës dhe përdhunim të kunatës tjetër. Në 2007, ai u arrestua për vrasjen me thikë të bashkëshortes. Në qershor të 2022 ai u rikthye në burg me akuzën e dhunës në familje ku u lirua pak javë më parë më 16 shkurt të këtij viti. Dan Hurda akuzonte bashkëshorten e tij Elenën se fëmijën që priste nuk e kishte me të dhe për këtë fakt e dhunonte. Ikja e saj nga shtëpia dhe rikthimi tek prindërit e agravoi situatën aq sa ish-dhëndri paralajmëroi vrasjen që e vuri në zbatim mbasi doli nga burgu. ©Lapsi.al
