Dinamikat e masakrës së ditës së djeshme në Paskuqan vijojnë ende të zbardhen. Mesditën e të mërkurës Ramzan (Dan) Hutra vrau tre gra dhe plagosi tre të tjera. Në momentin që Hutra është futur brenda në banesë, nuk ka biseduar me asnjë prej personave të familjes Hysa. Në banesë ndodheshin edhe 2 fëmijë, foshnja 1 muajsh i Elena Hysës dhe autorit, si dhe fëmija 6 muajsh i motrës së Elenës. Sipas deklarimeve, para se të niste të qëllonte me breshëri, 40-vjeçari ka çuar në banak fëmijën e Elenës. Më pas ka breshërinë. Një nga viktimat, kunata e Elenës, Hasime Dafku, ishte shtatzënë. Prapëseprapë, Hutra ka dëshmuar në polici se nuk është penduar.
“Qëkur rashë në burg kisha vetëm një qëllim, të vrisja kush më ka rënë në qafë. Sapo kam dalë nga burgu kam nisur të planifikoj vrasjet. Shkoja dhe vija çdo ditë nga Kukësi dhe vëzhgoja personat. Sigurova armën dhe makinën me qira derisa u poqën kushtet që t’i vrisja. Nuk pendohem sepse vdekjen e kanë merituar jo vetëm ato por edhe të tjerë që s’munda dot t’i gjeja. Unë nuk kisha asnjë qëllim në jetë vetëm t’u merrja jetën atyre që më kanë hyrë në hak”, ka thënë Hutra.
Si ndodhi ngjarja
Dan Hutra tronditi kryeqytetin me 3 ngjarje të ndryshme kriminale. Makabriteti i veprimeve të tij la pas 3 gra të vrara dhe 3 të tjera të plagosura. Gjakftohtë dhe i armatosur ai u përlesh fillimisht me Marjana Gurakuqin ne Astir duke tentuar t’i marrë paratë. Gurakuqin e la të plagosur me thikë. Më pas ai shkoi në banesën e familjes së ish-bashkëshortes së tij Elena Hysës në zonën e Kodër-Kamzës. Aty qëlloi me breshëri drejt grave të familjes. Si rrjedhojë la pa jetë motrën e gruas dhe nusen e vëllait të saj dhe plagosi ish-bashkëshorten dhe nënën e saj.
Gjakftohtë pasi kreu krimin ai u largua i armatosur me mjetin e tij Benz. Hutra iku nga vendngjarja jo për t’u arratisur, por për të kryer një tjetër krim. Kësaj radhe 'goditi' në rrugën “Besëlidhja” në Kamëz. Aty ai vrau shtetasen Etleva Kurti, 31 vjeçe. E tërë kjo pa u ndeshur me asnjë pikë kontrolli apo patrullë policie.
Megjithatë, nuk ishte hera e parë që Dan Hutra përfshihej në krime. Në vitin 2003 ai është arrestuar për pengmarrje të nënës dhe kunatës dhe përdhunim të kunatës tjetër. Në 2007, ai u arrestua për vrasjen me thikë të bashkëshortes. Në qershor të 2022 ai u rikthye në burg me akuzën e dhunës në familje ku u lirua pak javë më parë më 16 shkurt të këtij viti. Dan Hurda akuzonte bashkëshorten e tij Elenën se fëmijën që priste nuk e kishte me të dhe për këtë fakt e dhunonte. Ikja e saj nga shtëpia dhe rikthimi tek prindërit e agravoi situatën aq sa ish-dhëndri paralajmëroi vrasjen që e vuri në zbatim mbasi doli nga burgu. ©Lapsi.al
