Një 54-vjeçar ka rënë në prangat e policisë së Tiranës. Ai ishte shpallur në kërkim për kultivim të bimëve narkotike. Në pranga përfundoi Petrit Kamberi, i dënuar me 4 vjet e 8 muaj burgim. Mësohet se ai kultivoi bimë narkotike, në Zall Bastar.
Njoftimi i policise:
Shërbimet e Komisariatit të Policisë Nr. 4, në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar dhe në informacionet e marra në rrugë operative, për vendndodhjen e një shtetasi të kërkuar për kultivim të bimëve narkotike, organizuan dhe finalizuan operacionin policor të koduar “Zgura”.
Si rezultat i këtij operacioni, u bë kapja në Zall Bastar dhe arrestimi i shtetasit:
– Petrit Kamberi, 54 vjeç, banues në Tiranë.
Ky shtetas ishte shpallur në kërkim, pasi Gjykata e Apelit Tiranë, e ka dënuar me 4 vjet e 8 muaj burgim, për veprën penale “Kultivimi i bimëve narkotike”. Në vitin 2014, 54-vjeçari ka kultivuar bimë narkotike kanabis, në fshatin Zgurë, Zall Bastar.
Materialet i kaluan Prokurorisë, për veprime të mëtejshme.
