Kryetari i Partisë Demokratike, Sali Berisha zhvilloi mbrëmjen e së martës një takim me strukturat drejtuese të disa degëve të Tiranës. Në fjalën e tij kryedemokrati akuzoi kryeministrin Rama se po i bën presion gjykatës në ditët e fundit përpara se ajo të vendosë për vulën e PD-së.
“Po bën ndërhyrjet e fundit armiqësore ndaj PD-së në gjykatë. Por unë i them, se absolutisht ndaj çdo vendimi tënd, faturën do e paguash vetëm ti si kryeministër, si krim-ministër, qeveria jote. Ne nuk shuhemi, ne jemi forcë politike e pamposhtur. Ne e faktuam këtë" - tha Berisha që u shpreh i vendosur për protestën e 3 marsit.
"Ne do t’i qëndrojmë atij. 3 marsi është një ditë e veçantë, një ditë që do të flasim fuqishëm, protestën tonë, revolucionin tonë. Kufomë politike e pakallur. Sot ai përbën rrezikun më të madh për këtë vend” – tha Berisha që përsëriti akuzat ndaj Ramës për çështjen “McGonigal.
“Sot ai është i gatshëm të marrë çdo vendim me qëllimin e vetëm që të shpëtojë lëkurën e tij. Sepse ai e di, me korruptimin e McGonigal, thikën e tmerrshme që i futi marrëdhënieve shqiptaro-amerikane, por së pari sigurisë së SHBA-së duke i rekrutuar me para kryezbuluesin, ai nuk mund të ketë më kurrë shpresë për të ardhme politike. Ai ka kryer një suicid (vetëvrasje) politik. Por do të bëjë gjithçka, do të marrë çdo vendim, do të mbajë çdo qëndrim në mënyrë që të mund të mbijetojë.
Dhe ne i themi atij se ne do të mbajmë çdo qëndrim, do të marrim çdo qëndrim në mënyrë që të të shporrim njëherë e mirë nga skena politike. Nuk kufomë politike nuk mbahet kurrë në pushtet. Shoqëria dhe vendi duhet të shpëtojnë një minutë e më parë prej tij. Ai na fton ne për qëndrime, vendime për të cilat do të paguajë çmimin më të madh” – paralajmëroi Berisha.
Në 3 mars Gjykata e Apelit do të vendosë për çështjen e vulës së PD-së. Në të njëjtën ditë PD ka njoftuar një tubim në qendër të Tiranës. ©LAPSI.al
