Një 40 vjeçar është arrestuar dhe një 60 vjeçar është proceduar në gjendje të lirë si autorë të zjarrvënieve në Fier. Policia bën me dije se Festim Karriçi është arrestuar pasi ka ndezur zjarr për të djegur barërat në tokën e tij në kodrat e fshatit Kuman por nga përhapja e flakëve janë djegur sipërfaqe të tjera.
Policia njofton se është proceduar penalisht 60 vjeçari Tomorr Isufaj pasi në fshatin Ngreçan të Mallakastrës ka ndezur një zjarr për djegien e barërave në tokën e tij dhe si pasojë e përhapjes së flakëve, janë djegur sipërfaqe toke me shkurre dhe barëra, në pronësi të shtetasve të tjerë.
Njoftimi i policisë:
DVP Fier/Vihet në pranga 1 shtetas dhe procedohet penalisht 1 tjetër, autorë të dyshuar të 2 rasteve të zjarrvënieve.
Si rezultat i punës për parandalimin dhe goditjen e rasteve të zjarrvënieve të qëllimshme apo nga pakujdesia, si dhe për identifikimin dhe vënien përpara përgjegjësisë ligjore të autorëve të tyre, shërbimet e Policisë së Fierit kanë konstatuar dhe goditur 2 raste të kësaj veprimtarie të kundërligjshme.
-Specialistët për Hetimin e Krimeve të Komisariatit të Policisë Fier arrestuan shtetasin Festim Karriçi 40 vjeç, banues në Zharrëz, pasi në kodrat e fshatit Kuman, ka ndezur zjarr për djegien e barërave në tokën e tij dhe si pasojë e përhapjes së flakëve, janë djegur edhe sipërfaqe toke me shkurre dhe me ullinj, në pronësi të shtetasve të tjerë.
-Specialistët për Hetimin e Krimeve të Komisariatit të Policisë Mallakastër referuan materialet në Prokurori dhe nisi procedimi në gjendje të lirë për shtetasin Tomorr Isufaj 60 vjeç, pasi në fshatin Ngreçan, Mallakastër, ka ndezur zjarr për djegien e barërave në tokën e tij dhe si pasojë e përhapjes së flakëve, janë djegur sipërfaqe toke me shkurre dhe barëra, në pronësi të shtetasve të tjerë.
