Volodymyr Zelensky ka zbuluar për herë të parë dhomën modeste në të cilën jeton larg familjes së tij nga ku drejton luftën kundër Vladimir Putinit. Udhëheqësi ukrainas është izoluar prej tashmë 1 viti në një bunker të mbuluar nga një unazë çeliku në kryeqytetin ukrainas Kiev.
Kur Putini urdhëroi trupat e tij të hynin në Ukrainë më 24 shkurt 2022, Zelensky nxitoi shkonte në një vend të quajtur “Bankova”. Që nga ajo ditë ai është strehuar në këtë zyrë prej betoni. Vetë Zelensky ka zbuluar për gazetarin ukrainas Dmytro Komarov jetën e tij nga nisja e luftës.
“Unë e dua familjen time, por për mua si president, të qenit këtu ishte një prioritet. I mblodha gjërat shumë shpejt dhe erdha këtu. Kudo nëpër korridore ishte errësirë. Kjo tani është shtëpia ime. Jetoj këtu prej 1 viti" – tha Zelensky.
45-vjeçari thotë se tashmë është mësuar në dhomën e tij që tashmë e quan “shtëpi” edhe pse larg gruas dhe dy fëmijëve të tij. Presidenti i bëri gazetarit një “tur” në bunker, duke treguar veshjet e tij të luftës me ngjyrë kaki të bëra tashmë simbol.
“Kam një gardërobë të vogël këtu. Rrobat janë të gjitha të ngjashme. Unë thjesht nuk po përdor më kostume tani" – tha ai. Megjithatë ai thotë se po e mban edhe një kostum si një "simbol se lufta do të përfundojë së shpejti".
“Do të fitojmë së shpejti, kështu që do të veshim sërish kostume” – tha Zelensky. Ai tregoi dhomën e tij të gjumit, me krevatin e tij tek dhe mobiljet modeste. Duket shumë larg luksit që shumica do të prisnin se një President mund të kishte. Një televizor i vogël me ekran të sheshtë është ngjitur në mur përpara shtratit të tij, i shoqëruar nga një lavaman dhe disa mobilie të tjera.
Ai tregoi se si u mësua t'i mbajë dritat e fikura në përpjekje për të mos u kërcënuar nga një sulm. Në zyrën e tij mban në tavolinën e punës një foto të tij dhe të familjes së paraluftës.
Teksa vijon të udhëheqë vendin përballë pushtimit barbar të Putinit, Zelensky rrallë herë mund të shohë gruan e tij Olena, vajzën Aleksandra, 19 vjeç dhe djalin Kiril, 10 vjeç. Në përvjetorin e parë të luftës të premten, Zelensky u përlot kur foli për jetën larg njerëzve të tij të dashur.
“Gruaja ime dhe fëmijët e mi janë njerëzit më të rëndësishëm për mua. Nuk arrij t’i shoh shumë shpesh, por jam shumë i lumtur që kam këtë familje. Gjëja më e rëndësishme është t'i bëj ata të jenë krenarë për mua" – tha Zelensky.
Jeta e tij ka kaluar në disa faza interesante. Nga një aktor humori, ai u bë president dhe tashmë lider i një vendi në luftë duke bërë që shumë ta krahasojnë edhe me Winston Churchill. I parë gjerësisht si një figurë anti-establishment, ai fitoi në mënyrë surprizë zgjedhjet presidenciale të 2019-së. Në atë kohë ai premtoi t’i jepte fund konfliktit midis Ukrainës dhe Rusisë që Putin filloi duke aneksuar Krimenë në 2014-ën.
Ai ishte mjaft popullor brenda vendit dhe pati disa dalje të shkurtra në skenën e politikës botërore. Por tashmë, një vit pas pushtimit të vërtetë të Ukrainës, ish-aktori njihet në mbarë botën për karizmën dhe vendosmërinë e tij. Madje Zelensky është shndërruar nga një yll televiziv që luante me politikën, në një hero ndërkombëtar. ©LAPSI.al
