4 persona kanë humbur jetën si pasojë e një aksidenti mjaft të rëndë që ka ndodhur mbrëmjen e kësaj të mërkure në hyrje të Shtimes. Mediat e Kosovës citojnë burime zyrtare nga policia e rajonit të Ferizajt. Sipas këtyre burimeve, rreth orës 19:15 kanë qenë 3 automjete që janë përplasur me njëri – tjetrin.
Përplasja ka qenë mjaft e rëndë dhe për pasojë 4 persona kanë humbur jetën ndërsa janë plagosur edhe 2 të tjerë. Drejtori i Spitalit të Ferizajt tha se një grua shtatzënë dhe bashkëshorti i saj janë dërguar në Prishtinë për trajtim të mëtutjeshëm.
Mësohet se të dy janë në gjendje të rëndë si pasojë e plagëve të shkaktuara nga aksidenti. Drejtori i Spitalit, tha se gruaja ka fraktura në këmbë si dhe krahun e thyer. Ai bëri të ditur se një nga viktimat e aksidentit ka ndërruar jetë teksa po transportohej për në spital. Në vendin e ngjarjes ka shkuar prokuroria e cila po heton për rrethanat e aksidentit.
Sipas autoriteteve, të katër viktimat kanë qenë duke udhëtuar në të njëjtën makinë. Sipas të dhënave paraprake makina e viktimave është përplasur me makinën e të plagosurve ndërsa një automjet i tretë ka tentuar të shmangë përplasjen, por ka dalë nga rruga duke përfunduar në kanal. ©LAPSI.al
