Policia e Tiranës ka bërë të ditur masat që ka marrë për të siguruar protestën e opozitës kundër Edi Ramës që do të mbahet nesër në Tiranë.
Policia thotë se disa rrugë në kryeqytet do të bllokohen nga ora 10:00 e paradites deri në përfundim të protestës.
Gjithashtu janë bërë të ditur edhe rrugët ku nuk lejohet parkimi.
Njoftim i Drejtorisë Vendore të Policisë Tiranë:
Drejtoria Vendore e Policisë Tiranë, në zbatim të detyrave të përcaktuara në planin e masave të hartuar nga Policia e Shtetit, me qëllim garantimin e rendit dhe sigurisë, para, gjatë dhe pas përfundimit të tubimit që do të zhvillohet në datën 11.02.2023, në orën 12:00, në bulevardin ‘Dëshmorët e Kombit’, në Tiranë, do të angazhojë shërbimet e Policisë, për bllokimin e qarkullimit në disa segmente rrugore, si dhe për bllokimin e pjesshëm të qarkullimit në disa segmente të tjera rrugore.
Njoftojmë qytetarët se duke filluar nga ora 06:00 e datës 11.02.2023, nuk do të lejohet parkimi i automjeteve, në rrugët e poshtëshënuara:
Bulevardi ‘Dëshmorët e Kombit’, sheshi ‘Nënë Tereza’, rruga ‘Ismail Qemali’, nga kryqëzimi i rrugës së Elbasanit me rrugën ‘Ibrahim Rugova’, rruga ‘Papa Gjon Pali II’, bulevardi ‘Zhan D'Ark’ dhe bulevardi ‘Bajram Curri’, nga kryqëzimi i rrugës së Elbasanit me rrugën ‘Ibrahim Rugova’.
Gjithashtu, në këto rrugë, do të bllokohet qarkullimi i automjeteve, nga ora 10:00 e datës 11.02.2023 deri në përfundim të tubimit.
Policia kërkon mirëkuptimin e qytetarëve që të shmangin lëvizjen me automjete, në këto akse rrugore dhe të përdorin rrugë alternative, për të mos penguar lëvizjen e lirë të pjesëmarrësve në tubim.
Policia garanton qytetarët se ka marrë të gjitha masat në përmbushje të përgjegjësive institucionale, për garantimin e rendit dhe të sigurisë, para, gjatë dhe pas përfundimit të tubimit, si dhe për garantimin e sigurisë rrugore, në të gjithë territorin e vendit, veçanërisht në sheshet dhe në segmentet rrugore, në të cilat do të zhvillohet tubimi.
