Këshilli i Ministrave miratoi sot dy marrëveshje për heqjen e vizave me Emiratet e Bashkuara dhe Kinën.
Përsa i përket marrëveshjes me Emiratet e Bashkuara, vizat hyrëse janë përjashtuar për personat që kanë pasaporta diplomatike apo pasaporta speciale dhe të shërbimit.
Vendime të miratuara në mbledhjen e Këshillit të Ministrave, datë 8 Shkurt 2023:
V E N D I M PËR MIRATIMIN, NË PARIM, TË MARRËVESHJES ME SHKËMBIM NOTASH PËR NDRYSHIMIN E MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË EMIRATEVE TË BASHKUARA ARABE, PËR PËRJASHTIMIN E NDËRSJELLË TË VIZËS HYRËSE PËR MBAJTËSIT E PASAPORTAVE DIPLOMATIKE DHE SPECIALE/TË SHËRBIMIT, NËNSHKRUAR MË 13 PRILL 2015
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit për Evropën dhe Punët e Jashtme, Këshilli i Ministrave
V E N D O S I:
Miratimin, në parim, të marrëveshjes me shkëmbim notash për ndryshimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Emirateve të Bashkuara Arabe, për përjashtimin e ndërsjellë të vizës hyrëse për mbajtësit e pasaportave diplomatike dhe speciale/të shërbimit, nënshkruar më 13 prill 2015.
Ndërsa me Kinën janë hequr vizat për personat me pasaporta të zyrtarëve publikë dhe për qytetarët e zakonshëm.
V E N D I M PËR MIRATIMIN E MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS POPULLORE TË KINËS, PËR HEQJEN E NDËRSJELLË TË VIZAVE PËR MBAJTËSIT E PASAPORTAVE TË ZYRTARËVE PUBLIKË DHE PASAPORTAVE TË ZAKONSHME
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit për Evropën dhe Punët e Jashtme, Këshilli i Ministrave
V E N D O S I:
Miratimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Popullore të Kinës, për heqjen e ndërsjellë të vizave për mbajtësit e pasaportave të zyrtarëve publikë dhe pasaportave të zakonshme, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
