Seanca e sotme parlamentare do të fokusohet te skandali me ish-agjentin e FBI Charles McGonigal. Deputeti i Partisë Demokratike, Enkelejd Alibeaj ka kërkuar një interpelancë me kreun e qeverisë lidhur me këtë çështje. E njëjta kërkesë është bërë nga deputetët që mbështesin kryetarin e PD-së Berishën. Ndërkohë vetë Berisha, pasi bllokoi Foltoren seancën e kaluar, është përjashtuar me 10 ditë nga punimet e Kuvendit. Këtë 'dënim' ai e ndan bashkë me 4 deputetë. Përkatësisht ata janë: Belind Këlliçi, Flamur Noka, Edmond Spaho dhe Edi Paloka. Kërkesa për përjashtimin e deputetëve të Partisë Demokratike erdhi nga maxhoranca socialiste.
Kujtojmë se në dosjen hetimore ndaj ish-kreut të kundërzbulimit të FBI-së në Nju Jork, përmendet disa herë emri i Edi Ramës. Aty përfshihen dhe marrëdhëniet e dyshimta të të dyve me 2 persona me kombësi shqiptare të cilët thuhet në dosje se i kanë dhënë rreth 225 mijë dollarë Mc Conigan. Opozita ka vënë theksin dhe tek përfshirja e McGonigal në disa kompani te dyshimta që operojnë në Shqipëri si dhe për përfshirje në investime në vend dhe të disa sipërmarrësve rusë, të lidhur ngushtë me Vladimir Putin.
