Prokuroria e Posaçme Kundër Korrupsionit dhe Krimit të Organizuar (SPAK) ka nisur hetimet pas publikimit të dosjes së ish-agjentit të FBI-së Charles McGonigal, i cili kishte zhvilluar takime dhe me kryeministrin Edi Rama, Në njoftimin për shtyp, bëhet me dije se SPAK ka pranuar kërkesën e deputetit të Partisë Demokratike Gazment Bardhi. Pas depozimit të kërkesës nga ana e Bardhit, SPAK është vënë në lëvizje. Ata kanë kërkuar gjithashtu që deputeti i Partisë Demokratike t’u vërë në dispozicion materialet fillestare të drejtësisë amerikane që disponohen prej tij.
Ky është reagimi i parë që vjen nga SPAK, që mbas publikimit të dosjes që nxorri zbuluar dhe takimet e ish-agjentit me kryeministrin Edi Rama. McGonigal ka zhvilluar takime të njëpasnjëshme me kryeministrin Edi Rama dhe dy persona që në dosje emërtohen si ‘Personi A’ dhe ‘Personi B’. Ata janë përkatësisht Agron Nezaj e Dorian Duçka, të dy të lidhur me qeverinë shqiptare.
Nezaj del në dosje si njeriu që i jep 225 mijë dollarë McGonigal në mënyrë që të ndërhyjë në FBI që të nisë hetimin për personin që po lobonte në SHBA për PD-në, në vitin 2017 kur drejtohej nga Lulzim Basha. Supozohet që bëhet fjalë për Nicolas (Nick) Muzin. Ndërsa Duçka del si njeriu që e shoqëron kudo ish-agjentin. Ai paguan fluturimet e akomodimet e tij, si dhe i përcjell informacionet e nevojshme që do t’i shërbenin në nisjen e hetimit nga FBI. Rama mohon të ketë lidhje me akuzat e ngritura nga McGonigal.
