Presidenti ukrainas Volodymyr Zelensky deklaroi këtë të mërkurë se dëshironte që aleatët perëndimorë t’i dërgonin avionë dhe raketa me rreze të gjatë veprimi për ta ndihmuar në zmbrapsjen e trupave ruse.
“Kam folur sot me Sekretarin e Përgjithshëm të NATO-s, Jens Stoltenberg... Ne gjithashtu duhet të marrim raketave me rreze të gjatë veprimi në Ukrainë. Është e rëndësishme. Ne duhet të zgjerojmë bashkëpunimin tonë në fushën e artilerisë”, - tha Zelensky, duke shtuar se Ukraina kishte nevojë edhe për avionë. “Kjo është një ëndërr. Dhe kjo është një detyrë” – tha ai.
Lutja e fundit e Zelensky vjen vetëm pak orë pasi SHBA dhe Gjermania njoftuan të dyja se do të dërgonin tanke M1 Abrams dhe Leopard 2 për të mbështetur përpjekjet e forcave të armatosura të Ukrainës për të shtyrë trupat e Vladimir Putinit në Ukrainën lindore. Zelensky, i cili mbushi 45 vjeç të mërkurën, falënderoi kancelarin gjerman Olaf Scholz dhe udhëheqësin amerikan Joe Biden për vendimin e tyre për të dërguar tanke të rënda në Ukrainë.
“Është një hap i rëndësishëm në rrugën drejt fitores”, shkroi presidenti ukrainas në Twitter, duke falënderuar Biden për vendimin e tij “të fuqishëm”. Ai u bëri thirrje vendeve perëndimore që të dërgojnë shpejt tanket. "Shpejtësia dhe sasia janë çelësi tani" - tha ai, duke iu referuar dërgesave dhe trajnimit të ushtarëve. “Shteti terrorist duhet të humbasë”, tha Zelensky, duke iu referuar Rusisë. "Sa më shumë mbështetje mbrojtëse të marrin nga bota heronjtë tanë në front, aq më shpejt do të përfundojë agresioni i Rusisë."
Shtetet e Bashkuara njoftuan më herët se do të ofrojnë 31 tanke Abrams për të ndihmuar Ukrainën duke pasqyruar një lëvizje të ngjashme nga Gjermania. Njoftim shënon një lehtësim të madh për Kievin, i cili ka kërkuar për muaj të tërë që tanket e rënda perëndimore të ndihmojnë betejën e tij. Rusia e quajti ofrimin e dhjetëra tankeve nga Perëndimi për Ukrainën si një "provokim të hapur" dhe paralajmëroi se furnizimet e reja të NATO-s "do të digjen si gjithë të tjerët". ©LAPSI.al
