Partia e Lirisë ka dëshmuar sot me fakte manipulimin që iu është bërë qytetarëve shqiptarë nga kryeministri Edi Rama dhe kryetari i Bashkisë së Tiranës, Erion Veliaj.
Kohë më parë Rama deklaroi në Komisionin Hetimor për Inceneratorët, se në inceneratorin e Tiranës bëhet ndarja e mbeturinave në burim, riciklimi dhe më pas djegia, por nga pamjet që ka siguruar Partisë e Lirisë, shihet qartë se aty bëhet vetëm kapsulimi.
Në 180 ditë filmime, nga korriku 2022 deri në janar të 2023, provohet se në inceneratorin e Tiranës nuk kryhet asnjë proces djegieje i mbeturinave, por vetëm groposje e tyre, si në çdo landifill të zakonshëm.
“Edi Rama dhe Erion Veliaj duhet të dalin të dy para drejtësisë për aferën e inceneratorëve. Deklaratat e tyre në Komisionin Hetimor janë gënjeshtra dhe për veprimet dhe deklarimet e tyre duhet të dalin bashkë. Edi Rama dhe Erion Veliaj në dy kokat kryesore të grupit të strukturuar kriminal të aferës së inceneratorëve”, tha Kryemadhi.
Nga pamjet e filmuara me dron, nga gjurmimi i një qeseje fosforeshente të vendosur në një kazan plehrash nga vetë Kryemadhi, kuptohet qartë që në inceneratorin e Tiranës nuk kryhet asnjë proces, qoftë nga ato që zotohet kryeministri në komision, qoftë edhe nga deklarimet e përfaqësuesve të kompanisë. Aty kryhet vetëm procesi i peshimit dhe groposjes së mbetjeve. Pra, asnjë proces tjetër për të cilin kompania paguhet 29 euro për ton!
Procesi është i njëjtë me atë të landfillit të Bushatit në Shkodër, ku paguhen vetëm 1600 lekë pa TVSH. Nisur nga kjo e dhënë, shqiptarëve iu vidhen nga taksat e tyre 15 euro për ton, thjesht e vetëm për groposjen e mbeturinave.
