Rusia dhe Bjellorusia kanë nisur stërvitjet e përbashkëta të forcave ajrore këtë mëngjes, duke rritur frikën në Kiev dhe në Perëndim se Moska mund të përdorë aleatin e saj për të nisur një ofensivë të re tokësore në Ukrainë.
Sipas një deklarate të publikuar në Telegram të Ministrisë së Mbrojtjes të Bjellorusisë, njësitë nga forcat e hapësirës ajrore të Rusisë mbërritën në Bjellorusi të dielën mbrëma. Pak pas orës 8 të mëngjesit me orën lokale, ministria tha se kishin filluar stërvitjet e përbashkëta ushtarake.
Minsk më herët tha se stërvitjet janë mbrojtëse. Megjithatë, grumbullimi i vazhdueshëm i trupave ruse në Bjellorusi, i kombinuar me një stuhi të aktivitetit ushtarak në vend, është një jehonë e asaj që po ndodhte atje pak para pushtimit rus të Ukrainës në shkurt, kur Moska përdori vendin si trampolinë për të nisur sulmin.
Ministria e mbrojtjes e Bjellorusisë tha vetëm se njësitë e forcave ajrore ruse kanë mbërritur në Bjellorusi. Situata në kufirin jugor të Bjellorusisë, kufiri me Ukrainën nuk është shumë e qetë dhe Ukraina ka “provokuar” Bjellorusinë, tha Pavel Muraveyko, zëvendës sekretari i këshillit të sigurisë bjelloruse.
Ukraina ka paralajmëruar vazhdimisht për sulme të mundshme nga Bjellorusia dhe presidenti Volodymyr Zelenskiy tha javën e kaluar se vendi duhet të qëndrojë në gatishmëri në kufirin e tij me Bjellorusinë.
Kremlini ka mohuar se ka ushtruar presion ndaj presidentit bjellorus, Alexander Lukashenko, për të ndërhyrë në luftën e tij kundër Ukrainës. Minsk nga ana tjetër ka deklaruar se nuk do të ndërhyjë në luftë.
