Kryetari i Bashkisë së Dropullit, Dhimitraq Toli, nuk e ka aspak problem jo vetëm të marrë pjesë në festat shoqatave të të ashtuquajturit “Vorio Epir”, por publikon edhe foto me flamurin e gjoja autonomisë së pretenduar të këtij rajoni në vitin 1914. Janë kryesisht organizata ekstremiste greke të cilat qëndrojnë shpesh në trazira të ndryshme që janë krijuar në zonën e minoritetit grek në vendin tonë dhe vazhdimisht ushqejnë një gjuhën e urrejtjes dhe pretendimeve territoriale.
Toli i ka publikuar fotot e një feste në Athinë në faqen e tij në Instagram e Facebook. Siç shkruan ai, në takimin festiv ishte edhe nënkryetari i Parlamentit të Greqisë, Nikitas Kaklamanis. Nëse për Athinën zyrtare nuk është dicka e re që mbështet shoqatat e të ashtuquajturit “Vorio Epir”, për kryetarin e një bashkie në Republikën e Shqipërisë, kjo është një shkelje e rëndë. Ky nuk është vetëm rasti i parë që Dhimitraq Toli bëhet protagonist i shfaqjeve nacionaliste.
Kujtoni përdhosjen që ai i bëri flamurit tonë kombëtar gjatë vizitës së kryeministrit grek, Mitsotakis në Dropull. Krahas një flamuri gjigand grek që Toli kishte vendosur në fasadën e një ndërtesa, për sy e faqe kishin shpalosur edhe një flamur të vogël shqiptar. Fotografia bëri xhiron e rrjetit dhe ishte kartolina më e keqe e asaj vizite ku Mitsotakis shoqërohej nga Edi Rama. Përgjegjësia ishte direkt e Bashkisë Dropull për organizimin.
Kryetari i Dropullit, Dhimitraq Toli, është zgjedhur pa garë në vitin 2019 si përfaqësues i Partisë Socialiste. Edi Rama e ka përdorur atë shpesh si shembull për t’i treguar Athinës zyrtare integrimin dhe përfaqësimin e mirë të minoritetit grek në Shqipëri, ndërkohë që vetë Toli keqpërdor funksionin zyrtar për orekset e tij nacionaliste që i përkasin fantazmave të së shkuarës. Shihni fotot më poshtë. ©LAPSI.al
