Dy të rinj kanë rënë në pranga për grabitjen e një dyqani ushqimor në Durrës vetëm dy ditë më parë. Në pranga kanë rënë Orges Mona, 34 vjeç dhe Erlind Shehaj, 35 vjeç, të cilët kanë kërcënuar me kallashnikov pronaren e dyqanit dhe i kanë marrë xhiron ditore prej 15 mijë lekësh.
Në cilësinë e provës materiale janë sekuestruar automjeti dhe veshjet që përdorën këta persona, gjatë kryerjes së vjedhjes, si dhe 3 aparate celularë. Operacioni policor ishte koduar "Step by step". Nga veprimet hetimore është bërë e mundur zbardhja dhe dokumentimi i autorësisë edhe për dy vjedhje të ndodhura më parë, të kryera nga këta dy të rinj.
Më datë 19.11.2022, në Arapaj, Durrës, Mona dhe Shehaj dyshohet se kanë vjedhur në dyqanin e shtetases E. S. një shumë parash. Po ashtu, me datë 27.12.2022, në lagjen nr. 6, në Durrës, dyshohet se kanë vjedhur sende me vlerë në banesën e shtetasit B. H.
Të dy shtetasit e arrestuar kanë qenë të dënuar edhe më parë për vjedhje dhe për veprimtari kriminale në fushën e narkotikëve. /LAPSI.al
