Mediat e Kosovës kanë publikuar identitetin dhe foto të pjesëtarit të FSK-së i dyshuar si autor i plagosjes së 2 të rinjve serbë në Shtërpcë. Të plagosurit janë njëri 21 vjeç e tjetri 11 vjeç. Autori quhet Azem Kurtaj, 33 vjeç dhe është arrestuar tashmë nga policia.
Ministri i Mbrojtjes së Kosovës, Armend Mehaj konfirmoi se ai është efektiv i ushtrisë së Kosovës. Mehaj tha se ai do të trajtohet sipas rregulloreve dhe ligjeve në fuqi të FSK-së.
“Tani u njoftova se në rastin që ka ndodhur në Shtërpcë është përfshirë një pjesëtar i Forcës së Sigurisë së Kosovës. Me rastin janë duke u marrë organet e sigurisë dhe drejtësisë. I njëjti do ta trajtohet edhe sipas rregulloreve dhe ligjeve që kemi në fuqi në Ministrinë e Mbrojtjes dhe Forcës së Sigurisë”, - shkroi Mehaj në Facebook.
Më 25 nëntor të vitit të kaluar, Azem Kurtaj ishte mes ushtarëve të Kosovës që u dekoruan nga Ushtria e Shqipërisë.
Babai i tij, Danush Kurtaj është dëshmor i UÇK-së. Ai mbeti i plagosur rëndë më 21 maj të vitit 1999 duke humbur jetën një ditë më pas. Ai kishte qenë i burgosur në Dubravë dhe ishte mes shumë viktimave në masakrën e kryer nga forcat serbe.
Ngjarja ndodhi pasditen e së premtes. 2 serbët u qëlluan nga një makinë në lëvizje. Ata kanë plagë të lehta dhe janë jashtë rrezikut për jetën. Motivi i ngjarjes mbetet i paqartë. Në zonë situata është tensionuar. Serbët lokalë kanë dalë në protestë duke bllokuar rrugën nga Shtërpca në Prevallë. Në zonë kanë shkuar forcat speciale për të mbajtur nën mbikëqyrje situatën.
Kryeministri Albin Kurti e ka dënuar ashpër ngjarjen.
“E dënoj ashpër sulmin ndaj dy qytetarëve të Kosovës në Shtërpcë. Thellësisht i brengosur për plagosjen e tyre. Sipas informatave, të rinjtë 11 dhe 21 vjeçar janë jashtë rrezikut për jetë dhe ju dëshiroj shërim të shpejtë.
Policia e Kosovës veçse ka arrestuar të dyshuarin i cili pa asnjë mëdyshje duhet dhe do të përballet me organet e drejtësisë. Njësitet relevante do të vazhdojnë hetimet deri në zbardhjen e të gjitha rrethanave të këtij akti të papranueshëm dhe të dënueshëm”, - ka shkruar Kurti në Facebook.
Edhe presidentja e Kosovës, Vjosa Osmani ka reaguar për incidentin, duke kërkuar që përgjegjësi të vihet para drejtësisë.
“Plagosja e të rinjve 11 dhe 21 vjeçar në Shtërpcë është akt i patolerueshëm, ndaj autori duhet të vihet para drejtësisë. Institucionet e Kosovës janë të përkushtuara maksimalisht që qytetarëve pa dallim etnie t`u ofrohet ambient i sigurt dhe i qetë”, - ka shkruar ajo. ©LAPSI.al
