Luiz Inacio Lula da Silva është betuar si presidenti i ri i Brazilit. Kjo është hera e tretë që ai mban postin më të lartë të vendit. Politikani veteran i krahut të majtë, i njohur gjerësisht si Lula ka udhëhequr vendin edhe nga 2003 dhe 2010. Lula mundi Jair Bolsonaro në zgjedhjet e tetorit. Ka pasur masa të rrepta sigurie për ceremoninë mes frikës se mbështetësit e Bolsonaro mund të përpiqeshin ta prishin atë. Vetë Bolsonaro nuk mori pjesë pasi u largua nga Brazili të premten.
Një det mbështetësish të Lulës u mblodhën para Kongresit që herët në mëngjes. Më shumë se 60 artistë performuan në dy skena gjigante të dekoruara me flamurin kombëtar. Lula dhe zëvendës-presidenti i ardhshëm Geraldo Alckmin parakaluan nëpër qytet me një makinë të hapur përpara se të shkonin në Senat. Me një ndryshim të dukshëm të politikës nga administrata e Bolsonaro, Marina Silva - një nga aktivistet më të njohura të klimës në Brazil - u riemërua në krye të ministrisë së mjedisit dhe klimës. Ajo pritet të arrijë premtimin e Lulës për "zero shpyllëzim" në Amazonë deri në vitin 2030.
Më shumë se 300 mijë njerëz u dyndën në kryeqytet për inaugurimin. Shteti i Brasilias është zotuar të vendosë 100% të forcës së tij policore në gatishmëri. Kjo pasi ekziston frika se mbështetës të Bolsonaro mund të kërkojnë të ndërpresin betimin. Një burrë u arrestua duke u përpjekur të hynte në zonën e inaugurimit. Ai mbante me vete një thikë dhe fishekzjarrë. Vetë Bolsonaro thuhet se fluturoi në shtetin amerikan të Floridës pasi u dha një lamtumirë të përlotur mbështetësve.
“Ne kemi një të ardhme të madhe përpara. Beteja u humb, por ne nuk do ta humbim luftën” - tha ai në një video në rrjetet sociale. Presidenti populist ka thënë vazhdimisht se nuk dëshiron të marrë pjesë në inaugurimin e pasardhësit të tij. Javën e kaluar, autoritetet arrestuan një mbështetës të Bolsonaro, i cili dyshohet se kishte vendosur eksploziv në një kamion karburanti pranë një aeroporti në kryeqytet në prag të Krishtlindjeve. Burri tha se shpresonte të "mbillte kaos" përpara inaugurimit të Lulës.
Mbështetës të tjerë të liderit në largim kanë qëndruar jashtë selisë së ushtrisë, ku i kanë kërkuar ushtrisë të nisë një grusht shteti. Policia tentoi të largonte demonstruesit, por u tërhoq pasi ata reaguan dhunshëm. Bolsonaro i ka dënuar protestat kundër humbjes së tij. Ai u ka kërkuar mbështetësve të tij që të "tregojnë se jemi ndryshe nga pala tjetër, se respektojmë normat dhe Kushtetutën". ©LAPSI.al
