Urimit për vitin e ri 2023 i janë bashkuar disa figura politike nga mazhoranca dhe opozita. Presidenti Bajram Begaj uroi një vit që ka kryefjalë dashurinë dhe jo luftën me njëri tjetrin, ndërsa përballë sfidave globale kërkoi mos-rënien në pesimizëm. Një thirrje pati edhe për politikën, që në këtë vit zgjedhor, të shmangin gjuhën e urrejtjes dhe mëritë politike.
Kryeministri i vendit Edi Rama ka uruar shqiptarët për Vitin e Ri 2023 me një video-mesazh. Ai e nisi videon me një kërkim ndjese për momentet që mund të ketë gabuar, e ndërsa thekson se ai ka bërë aq sa ka mundur për t’iu gjendur pranë qytetarëve. Rama zgjodhi vargje nga Ekleziastët, duke thënë se shpreson se 2023 të jetë viti i paqes, me shumë dashuri e buzëqeshje.
Edhe kryetarja e Kuvendit, Lindita Nikolla uroi të gjithë shqiptarët kudo ndodhen një vit sa më të mbarë. Ajo theksoi se “Ditët dhe vitet më të bukura i kemi përpara”.
Më herët, kreu i Partisë Demokratike Sali Berisha ka uruar gjithë shqiptarët për vitin e ri 2023. Në mesazhin e tij ai risjell në vëmendje zhvillimet jo vetëm në PD gjatë 2022, por në të gjithë Shqipërinë. Kryedemokrati nuk ka lënë pas akuzat ndaj kryeministrit Rama. Ai ka përmendur edhe paketën 80 milion euro për shtresat më të prekura. Sipas Berishës kjo nuk është gjë tjetër veçse një pilulë elektorale.
