Ambasadorja amerikane Yuri Kim ka sqaruar arsyet se pse ka shkuar në Këshillin e Lartë të Prokurorisë ku po zhvillohet procesi për zgjedhjen e kreut të ri të SPAK.
Në një prononcim për mediat, Kim tha se nuk ka asnjë mesazh të fshehur në praninë e saj në KLP. Sipas diplomates amerikane, është e rëndësishme për reformën në drejtësi, zgjedhja e kreut të ri të SPAK.
Ndër të tjera, Kim tha se nuk ka ardhur në KLP për t’i treguar prokurorëve se kë të votojnë për kreun e ri të SPAK.
"Ka shumë teori konspirative. Dua të shpjegoj përse kam ardhur. Ky është një moment i rëndësishëm për reformën në drejtësi dhe për SPAK. Erdha për të thënë që është një moment i rëndësishëm. Nuk ka asnjë mesazh të fshehur, SHBA-të kanë qenë të drejtpërdrejta me shtetin shqiptar. Ju e dini se unë nuk jam një person që i bëj gjërat e fshehta.Është bërë shumë përparim, shumë njerëz meritojnë meritë për këtë duke filluar nga qeveria e vendit. Merita i shkon edhe opozitës dhe kritikëve që e mbajnë qeverinë të ndershme, sepse kjo është puna e tyre. Merita i shkon medias dhe qytetarëve që ndjekin procesin. Puna e SHBA në këtë proces është t’ju mbështesë. Ju duhet ta doni reformën në drejtësi, ju duhet ta doni ndryshimin më shumë se ne." - u shpreh Kim.
Lexo më tej: A do dështojë Yuri Kim në kontrollin e SPAK
