Ministria e Punëve të Jashtme të Shqipërisë ka reaguar në lidhje me ngjarjen e rëndë të ndodhur këtë të mërkurë në Kanalin Anglez të La Mansh. Si pasojë e mbytjes së një varke humbën jetën të paktën 4 emigrantë.
Euronews Albania raporton se ka pasur një komunikim me Ministrinë tonë të Jashtme sipas të cilës nuk ka pasur asnjë shqiptar në gomone. Mediat shqiptare raportuan më herët se në varkë ishte edhe një shqiptar i mbijetuar.
Britanikja Sky News raporton se emigrantët ishin nga Afganistani, Iraku, Senegali dhe India. Ata kishin paguar nga 5 mijë paund një trafikanti për kalimin nga Franca në Britaninë e Madhe.
Nga një varkë që ndodhej në afërsi të vendit të ngjarjes dhe forcat e kufirit u shpëtuan 43 persona. Dyshohet se në barkë kanë qenë rreth 50 persona. Gjithsesi kërkimet kanë vijuar në La Mansh edhe me helikopterë dhe anije të forcave ushtarake.
Një peshkatar që shpëtoi 31 persona tha se u zgjua në herët në mëngjes kur emigrantët rrethuan varkën e tij "duke bërtitur për ndihmë". Kapiteni Raymond tha se kishte qenë duke fjetur kur u zgjua nga një anëtar i ekuipazhit të tij.
"Ka emigrantë pranë varkës. Një djalë po më varet në tela" – më tha ai. Në fillim mendova se ishte vetëm ai. Sapo mora pajisjet e mia të peshkimit, gjë që zgjati rreth 3 minuta, ndalova varkën dhe vrapova jashtë. Në anë të varkës ishin 5 prej tyre të varur" - tha ai. Raymond tha se më pas numëroi 45 persona që mbaheshin në gomonen e përmbysur. ©LAPSI.al
