Pas takimit që pati me kryeministrin Albin Kurti, emisari special i BE-së për dialogun, Miroslav Lajçak foli për situatën në veri dhe barrikadat e vendosura nga serbët në atë pjesë. Ai tha se pas këtij takimi do të takohet edhe me KFOR-in dhe EULEX-in. Mënyra më e mirë për të hequr barrikadat sipas tij është me marrëveshje politike dhe jo buldozerë.
“Do të takohem me KFOR-in dhe EULEX-in pas kësaj. Jam diplomat. Për mua mënyra më e mirë për të hequr barrikadat është me marrëveshje politike, jo me buldozerë” - tha Lajçak.
Lajçak tha se pati një diskutim të gjatë me kryeministrin Kurti. Ai shtoi se nuk mund të presin që diçka e keqe të ndodhë.
“Kemi kriza, barrikada dhe kemi situatë të vështirë në veri të Kosovës. Pata një diskutim të gjatë me Kurtin. Nuk mund të presim që diçka e keqe të ndodhë. Askush nuk është i lumtur me këtë situatë në veri” - tha ai.
Në këtë takim ishte i pranishëm edhe i dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar. ©LAPSI.al
