Asnjë tullë nuk është vënë ende për rezidencën e "Durrës, marina dhe jahte" por aty ka nisur tashmë shitja e apartamenteve nga Alabbar. Në një ambjent të krijuar enkas për të interesuarit janë afruar qytetarë nga Durrësi, Tirana dhe të huaj kureshtarë për çmimet e apartamenteve, që ende nuk kanë filluar të ndërtohen.
Në ambjentet e shitjeve kanë gjetur akoma më të interesuar investitorin Mohammed Alabbar.
Ai ka shoqëruar të interesuarit e parë dhe ka postuar disa foto në profilin e kompanisë në Facebook.
“Shqipëria më kujton vendin nga vij, ku zhvillimi, përparimi dhe rritja janë aty. Dhe besoj se në Durrës do të bëhet më e mira e të mirave” dëgjohet të thotë Alabbar në një video që ka shpërndarë kompania në rrjetet sociale.
Çmimi i një hyrjeje në rezidencë kushton minimumi 110 mijë euro. “Katet e ulta fillonin me çmimin bazë të investimit. Fillonin nga 1 mijë e 600 ose 700 deri në 2 mijë e 200 ose 300 euro” u shpreh një qytetar për Top Channel.
Lexo edhe: Polemikat/ Pse falen taksat për projektin me pallate dhe hotele në Durrës
Lexo edhe: Porti i Alabbarit/ Rama shan kundërshtarët, por s’jep as shifra, as përgjigje
Lexo edhe: Gafa/ Rama bie në kurth me historinë e Alabbar në Zagreb
Prezenca e Alabbar në Durrës si pjesë e fushatës së marketingut është kyçe për fillimin e projektit.
Dihet që kompania “Eagle Hills Development shpk” do të investojë vetëm 80 milion euro në fazën e parë të projektit dhe 80 të tjera do t’i marrë kredi. Por i gjithë projekti parashikon të qarkullojë mbi 2 miliard euro ndërtime.
Skema është krahasuar me atë që bën çdo ndërtues në Tiranë, kur hap gropën e pallatit dhe me paratë e shitjes së apartamenteve ngre katet e para.
Njësoj edhe Alabbar, që do të zhpenzoje 80 milion euro për nisjen e punimeve, pastaj me paratë që fitohen nga shitja e apartamenteve do të vazhdojë ndërtimin e pallateve dhe godinave të banimit.
Pikërisht për këtë, tërheqja e blerësve që në fillim është shumë e rëndësishme për projektin. Pa fluksin e parave nga shitjet e para, investimi do të ishte në rrezik.
Për “Durrës, marina dhe jahte” ka pasur debate të forta politike, pasi mazhoranca e miratoi projektin në mungesë të plotë të transparencës.
"U bëjmë thirrje qytetarëve shqiptarë mos shpenzoni asnjë lek në këtë zonë krimi. U bëj thirrje kompanive shqiptare të mos bëhen ortakë në këtë vjedhje monstruoze” ka qenë thirrja e kreut të demokratëve Sali Berisha, sipas të cilit Alabbar duhet të tërhiqet menjëherë nga Shqipëria.
“I ftoj të gjithë qytetarët të mos bien pre e mashtrimeve dhe të mos shpenzojnë asnjë qindarkë për blerjen e apartamenteve në Projektin e Portit të Durrësit, që nuk është gjë tjetër veçse një skemë e pastër piramidale për vjedhjen e parave tuaja” ishte thirrja e Ilir Metës, kur u njoftua se së shpejti do të niste shitja e apartamenteve.
Opozita ka artikuluar edhe protestat si një nga mënyrat e reagimit, megjithatë, në ditën e parë gjithçka shkoi qetë./Lapsi.al
