Kryeministri i Britanisë së Madhe, Rishi Sunak ka zhvilluar një bisedë telefonike me kreun e qeverisë shqiptare, Edi Rama.
Lajmi bëhet i ditur nga faqja zyrtare e qeverisë britanike e cila shkruan se “Udhëheqësit mirëpritën partneritetin e ngushtë midis Mbretërisë së Bashkua dhe Shqipërisë dhe u angazhuan për forcimin e bashkëpunimit në tregti, investime dhe mbrojtje, duke përfshirë sigurinë kibernetike”.
Kryeministri britanik vlerësoi kontributin pozitiv të komunitetit shqiptar në Mbretërinë e Bashkuar, por të dy liderët ranë dakord se duhet bërë më shumë për të trajtuar migracionin ilegal dhe për të luftuar së bashku krimin e organizuar.
“Ata diskutuan mbi planet për të shtuar bashkëpunimin për të adresuar sfidat e përbashkëta duke përfshirë edhe mbylljen e boshllëqëve që po ndalojnë kthimin e shpejtë të azil-kërkuesve të refuzuar.
Kryeministri Edi Rama dhe Kryeministri Rishi Suna mirëpresin të punojnë së bashku për t’i trajtuar këto çështje dhe të thellojnë marrëdhënien gjithëpërfshirëse mes Mbretërisë së Bashkuar dhe Shqipërisë”, thuhet në njoftimin e qeverisë britanike.
