Makthi i koronavirusit është kthyer në Kinë. Këtë të mërkurën rastet e reja shënuan maksimumin e tyre të të gjitha kohërave në baza ditore që nga shpërthimi i pandemisë. Sipas të dhënave nga Komisioni Kombëtar i Shëndetësisë, infeksionet e brendshme ishin 31.444. Nga to 27.517 persona ishin asimptomatikë. Politika zero Covid në Kinë ka shpëtuar shumë jetë në vendin me 1.4 miliardë njerëz. Megjithatë kjo politikë ka dhënë një goditje ndëshkuese për ekonominë dhe jetën e njerëzve të zakonshëm.
Vala në rritje e rasteve vjen gjithashtu disa javë pasi vendi lehtësoi paksa disa nga kufizimet e tij Covid. Ata shkurtuan karantinën për kontakte të ngushta nga shtatë ditë në pesë ditë dhe tri ditë në shtëpi. Po ashtu u ndalua regjistrimi i kontakteve dytësore, gjë që lejoi shumë më tepër njerëz të shmangin karantinimin. Por përballë një rritjeje të përtërirë të rasteve në Pekin, si dhe vdekjeve të para nga virusi në muaj, zyrtarët kanë zbatuar tashmë disa kufizime në disa rrethe, me dyqane, shkolla dhe restorante të mbyllura.
Qyteti qendror i Zhengzhou do të zbatojë gjithashtu një bllokim efektiv për 6 milionë banorë nga e premtja, njoftuan zyrtarët. Kjo pason protestat e dhunshme në një kompleks të madh industrial që i përket prodhuesit të iPhone Foxconn. Firma ka kërkuar falje për një “gabim teknik” në sistemet e saj të pagesave.
