15 mijë paund janë sekuestruar në Rinas, para që vinin nga Britania e Madhe. Në njoftimin e policisë bëhet me dije se paratë janë gjetur në bagazhet e një 26-vjeçareje që vinte nga Anglia drejt Shqipërisë. Paratë janë sekuestruar, ndërsa e reja, e lindur në Kosovë dhe banuese në Austri, është proceduar për veprën penale “Mosdeklarimi në kufi i të hollave dhe i sendeve me vlerë”.
Njoftimi Rinas/Kontrolle të shtuara për goditjen e krimeve ndërkufitare. Evidentohet dhe goditet një rast i mosdeklarimit të të hollave. Sekuestrohen 15 000 paund, procedohet penalisht 26-vjeçarja që nuk i deklaroi. Shërbimet e Policisë Kufitare Rinas, në vijim të kontrolleve të shtuara për evidentimin dhe goditjen e paligjshmërive, kanë kaluar për kontroll të detajuar bagazhet e shtetases E. S., që kishte udhëtuar nga Anglia në drejtim të Shqipërisë. Gjatë kontrollit të valixhes së kësaj shtetaseje janë gjetur 15 000 paund, të cilat ajo nuk i kishte deklaruar, sipas përcaktimeve ligjore. Në vijim të veprimeve u sekuestrua shuma e parave dhe u referuan materialet në prokurori, në ngarkim të shtetases E. S., 26 vjeçe, lindur në Kosovë dhe banuese në Austri, për veprën penale “Mosdeklarimi në kufi i të hollave dhe i sendeve me vlerë”
