Kryetari i Partisë së Lirisë, Ilir Meta është pyetur nga gazetarët nëse ishte dakord me thirrjen e kryetarit të Partisë Demokratike Sali Berisha për protestë të qytetarëve në 6 dhjetor. Kreu i PL-së është pyetur në lidhje me protestën teksa ka qenë i pranishëm në Panairin e Librit te Pallati i Kongreseve. Meta preferoi të shmangte përgjigjen, duke deklaruar se donte të fliste vetëm për librat.
“Sot jemi te libri. Jemi te heronjtë e shoqërisë sonë. Përshëndes të gjithë krijuesit. Punojnë shumë, sakrifikojnë shumë në një aktivitet që do e quaja kulturor. Duhet më shumë mbështetje që libri të ketë mundësi të preket nga sa më shumë lexues dhe fëmijë. Përmes librit të formojmë qytetarë të denjë për vendin. Të jenë garant të demokracisë dhe të ardhmes sonë që është vetëm europiane”, tha Meta.
Dy ditë më parë, kryetari i PD-së Sali Berisha njoftoi se data 6 dhjetor është një datë që populli opozitar duhet të tregojë zërin para Bashkimit Europian. Ai tha se liderët e Bashkimit Europian duhet ta merrnin këtë protestë si një mikpritje. Po ashtu Berisha shtoi se do të merreshin masat për të mos patur raste dhune apo tensione.
