Zgjedhjet e mesmandatit në SHBA kanë një rëndësi të madhe për politikat amerikane në vijim. Presidenti Joe Biden do ta ketë të vështirë të marrë vendime të rëndësishme nëse dhoma e ulët dhe senati do të kontrollohen nga republikanët.
Rezultati i këtyre zgjedhjeve mund të ketë një ndikim të madh në drejtimin që SHBA do të marrë në vitet e ardhshme. Por edhe fatin e presidentit dhe partisë në pushtet.
Nëse kontrolli i njërës prej dy dhomave të Kongresit shkon tek republikanët, Biden ka të ngjarë të pengohet në përpjekjet e tij për të miratuar ligjet. Të dyja palët kanë propozuar ligje mbarëkombëtare në lidhje me të drejtat e abortit. Në nivel shtetëror, rezultatet e zgjedhjeve për guvernatorë mund të nënkuptojnë kufizime të mëtejshme të abortit në disa shtete.
LEXO EDHE: Ç’po ndodh në SHBA/ Pse zgjedhjet e sotme kanë rëndësi
Disa republikanë janë zotuar të mbyllin komitetin që hetonte trazirat e 6 janarit 2021 në Kapitolin e SHBA. Ata thanë se do të nisin seancat e tyre për djalin e Joe Biden, Hunter dhe lidhjet e tij të biznesit me Kinën nëse fitojnë kontrollin e Dhomës së Përfaqësuesve.
3 janë shtetet që kanë marrë më së shumti vëmendjen.
I pari është Pensilvania. Prokurori i Përgjithshëm i shtetit, demokrati Josh Shapiro, po përballet me Doug Mastriano, një senator shtetëror i mbështetur nga Donald Trump. Fituesi do të jetë në gjendje të zgjedhë zyrtarët zgjedhorë të shtetit për vitin 2024.
I dyti është Georgia. Dy vjet më parë, Biden u bë demokrati i parë që fitoi aty që nga viti 1992. Gara pritet të jetë një çështje e ngushtë pasi demokrati Raphael Warnock është përballë yllit të futbollit të mbështetur nga Trump, Herschel Walker. Ai po qëndron fort kundër abortit.
I treti është Arizona. Në vitin 2020, Presidenti Joe Biden u bë i pari kandidat demokrat për president që fitoi Arizonën që kur Bill Clinton fitoi shtetin në 1996. Gara për guvernator aty ka vënë përballë republikanin dhe ish-prezantuesin e lajmeve televizive të mbështetur nga Trump, Kari Lake, kundër Sekretares së Shtetit të Arizonës, Katie Hobbs, një demokrate që u bë e famshme përballë pretendimeve të Trump për mashtrime zgjedhore. ©LAPSI.al
