Presidentja e Kosovës, Vjosa Osmani ka lënë spitalin ku po trajtohej pas një ndërhyrje kirurgjike. Këshilltari për mediat i presidentes, Bekim Kupina i ka thënë Gazeta Express se ajo është larguar në gjendje të mirë shëndetësore.
“Presidentja Osmani me rekomandimin e mjekëve, sonte është liruar nga spitali në gjendje shumë të mirë shëndetësore”, ka thënë ai.
Kupina shtoi se Presidentja Osmani do ta vazhdojë marrjen e terapisë në banesën e saj deri në shërim të plotë. Gjithashtu, ka sqaruar se detyrat e saj, presidentja do të vazhdojë t’i kryejë nga banesa.
“Ajo po e vazhdon terapinë në banesën e saj prej nga po i kryen detyrat dhe përgjegjësitë e presidentes”, ka thënë ai.
Presidentja i është nënshtruar një ndërhyrje kirurgjike për heqjen e tëmthit më 2 nëntor.
“Pas rekomandimit nga mjekët specialistë, presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses”, u tha në njoftimin e Presidentes.
Presidentja u kritikua për faktin se zgjodhi një institucion privat shëndetësor për trajtimin e saj para institucioneve publike. Osmani tha se pjesë e spitalit ku u trajtua ishte edhe xhaxhai i saj. Sipas këshilltarit të saj, ai kishte ndjekur gjendjen e saj shëndetësore në vazhdimësi. /LAPSI.al
