Gerard Pique ka habitur botën pasi njoftoi tërheqjen nga futbolli në moshën 35-vjeçare. Ai lëshoi një deklaratë duke informuar fansat se ndeshja e së shtunës kundër Almerias në LaLiga do të jetë e fundit për të.
“Për javë të tëra, ka pasur biseda për mua”, tha Pique në një video. “Nuk kam thënë asgjë, por dua të flas tani. Si shumë prej jush, që vij nga një familje futbolli, unë kam qenë gjithmonë një tifoz i Barcelonës. Nuk doja të isha një futbollist dosido; Doja të luaja për Barçën.
Kohët e fundit, kam menduar shumë për kohën kur isha më i ri, çfarë do të kishte menduar Gerardi nëse i thoja se do të përmbushte të gjitha ëndrrat e tij, se do të luante për Barçën dhe do të ishte kampion i Evropës dhe i botës. Se ai do të luante me lojtarët më të mirë dhe do të ishte kapiteni i klubit. Futbolli më ka dhënë gjithçka, Barça më ka dhënë gjithçka, dhe ju, tifozët, më keni dhënë gjithçka. Dhe tani, që ëndrrat e mia të fëmijërisë janë përmbushur, ka ardhur momenti për ta mbyllur këtë kapitull. Unë gjithmonë kam thënë se nuk do të ketë asnjë ekip tjetër pas Barcelonës dhe kështu do të jetë. E shtuna do të jetë ndeshja ime e fundit në Camp Nou”.
