Në vitin e ardhshëm do të ngrihet një strukturë e re për kontrollin e sigurisë në zonat bregdetare. Lajmin e ka bërë me dije ministri i Brendshëm, Bledi Çuçi, teksa prezantoi në Kuvend buxhetin për vitin 2023. Sipas tij janë parashikuar 110 milionë lekë për blerjen e mjeteve lundruese dhe ngritjen e kësaj strukture.
Ndonëse Çuçi nuk e përmendi me emër, mësohet se struktura e re do të ketë emrin “Jonada”, ashtu sic quhej 7-vjecarja Jonada Avdia, që humbi jetën në Himarë pas goditjes nga skafi. Ky i fundit drejtohej nga një zyrtar i Policisë së Shtetit, Arjan Kasaj, që më herët ka qenë edhe shef komisariati në Himarë.
Ngjarja shkaktoi një tronditje të thellë në mes të sezonit turistik dhe protesta për dorëheqjen e Ministrit të Brendshëm dhe drejtorit të Policisë së Shtetit, asokohe Gledis Nano. Pagëzimin me emrin “Jonada” të strukturës së re, e ka njoftuar më herët kryeministri Rama kur prezantoi kreun e ri të Policisë së Shtetit, Muhamet Rrumbullaku.
Nuk dihet nëse Rama e ka marrë apo jo miratimin e familjes Avdia për emërtimin e strukturës me emrin e vogëlushes fatkeqe. Por sidoqoftë ngritja e një strukture të tillë ka më shume dimension propagandistik sesa mund të sjellë një ndryshim real të situatës në bregdet, ku ligjin e bën më i forti dhe Policia e Shtetit është totalisht jashtë kontrollit.©LAPSI.al
